ஞாயிறு, 16 செப்டம்பர், 2018

வெளிப்பாடா!




வைத்த பொருள்
வைத்த இடத்தில் இல்லாததால்
வேதனை பட்டு
உறவுகளைக் குறை சொல்லும்
முதியவருக்கு வயது எண்பது

உங்கள் அறைக்கு
ஒருவரும் போகவில்லை
யாரும் எடுக்கவில்லை என்றாலும்
பெரிசு ஏற்கமறுத்துமீண்டும்
மீண்டும் தேடுவது வாடிக்கை

மறதியால் தான்
மறுபடியும் தேடுகிறோமென்பதை
மறந்து போனாரா!—இல்லை
இன்னும் இளமையோடு
இருப்பதைக் காட்டும் வெளிப்பாடா!

ஞாயிறு, 9 செப்டம்பர், 2018

உன்னோட மனசாட்சி




கதிரவனை படைத்து
காலையில் எழவைத்து
கதிர் வீச்சால் முகம் காட்டி
கடமை தவறாமல்
நேர்மையோடு அவனை
செயல்பட வைத்து
வாழ்கின்ற மக்களுக்கு
வழிகாட்டியது இயற்கை

படிக்காத மாணவனை
பிரம்பால் அடித்து அவன்
குடும்பம் மேன்மையுற
உதவும் ஆசிரியர் போல,
கருத்த மேகத்தை அடித்து
குரலெழுப்பி ஓலமிட்டு
கண்ணீர்விட வைத்துஉயிர்களைக்
காப்பதும் ஆதவன் தானே!

வெள்ளை நிறத்தழகியை
வீதியில் உலாவரச்செய்து
அன்பும், காதலும் தந்து
இதயத்தைக் குளிரச்செய்ததும்,
பச்சிளம் குழந்தையின்
பசிபோக்க துணை நிற்கும்
நிலாப் பெண்ணை படைத்ததும்
இயற்கை தானே!

ஆணும், பெண்ணும் உழைக்க
அன்றே வழிகாட்டியதும்
இயற்கை தானே,
பகலில் உழைத்த ஆதவன்
படுத்துறங்கும் இரவில்
நிலாப்பெண்  பொறுப்பேற்க
நிம்மதி கொள்வாள்
இயற்கை அன்னை

இயற்கை அன்னை
இத்தனையும் கற்று தந்தும்
மக்களின் துயர் போக்க
மனமில்லையே சிலருக்கு,
தான் வாழ்ந்தால் போதுமென்று
தரம் தாழ்ந்தால்
உன்னை அழிக்காதா
உன்னோட மனசாட்சி?



சனி, 8 செப்டம்பர், 2018

அவமானப்பட்டான்


கேள்வி எதுவானாலும்
கேட்டதும் சட்டென்றுபதில்
கூறும் ஒரு பெரியவர்,
அவரை அவமானப்படுத்த
ஒரு அரைவேக்காடு முயல

ஒரு நாள்
ஒரு சிட்டுக்குருவியைத் தன்
உள்ளங்கைக்குள்
மூடி வைத்துக் கொண்டு
பெரியவரிடம் வந்தான்

இந்தக் குருவி உயிரோடு
இருக்கிறதா?
இல்லை செத்துவிட்டதா?
கூறுங்கள் பெரியவரே எனக்
கேட்டான்

உயிர் இருக்கு என்றால்
உள்ளங்கையில் வைத்தே
கொன்று விடுவான்,
இறந்து விட்டதென்றால்
கையை விரித்து பறக்க விடுவான்

என்பதை உணர்ந்த
பெரியவர் சொன்னார்
அது உன் கையில் தான்
இருக்கிறது என்றார்
அரைவேக்காடு தான்இப்ப
அவமானப்பட்டான்



புதன், 22 ஆகஸ்ட், 2018

என்றும் வாழும்




விளைச்சல் தரும் விதைகள்
விவசாயிகளின் வாழ்வாதாரம்
என்றிருக்கையில்
கன்றின் விதைகளை மட்டும்
கிட்டிக் கொண்டு நசுக்கி
சிதைப்பது முறையோ!
கண்டு பிடித்தது யார்?
கல்நெஞ்சக்காரனாஇல்லை
கூலிக்கு மாரடித்தவனா?

காளை கன்றுகளுக்குக்
கசையடித்தபோதும்
கொம்புகளை தீய்த்தபோதும்
காதுகளை அறுத்தபோதும்
உடலில் சூடு வைத்தபோதும்
கன்றுக்குட்டி கடும் வேதனையில்
கதறியிருக்குமே, பாவமில்லையா!
அத்தனையும் சகித்து வளர்ந்தன
அன்றைய காளைக்கன்றுகள்

அனைத்தையும் கன்றுகள் மறந்து
அடிமைகளைப்போல்
உழவர்களின் வயல் வேலைக்கு
உறுதுணையாயிருக்கும்,
உறவான பசுமாடோ
அன்னையைப்போல
அனைவரையும் பாலூட்டி வளர்க்கும்
மனித நேயம் மறைந்தாலும்--நெஞ்சில
மாட்டு நேயம் என்றும் வாழும்

செவ்வாய், 21 ஆகஸ்ட், 2018

பாதிப்பு இப்ப அதிகம்




அந்த காலத்தில்
அச்சாணி இல்லாமல்
தேர் ஓடாது
என்பதால் தானோ
அச்சாணியை அகமுடையானோடு
ஒப்பிட்டார்கள்

ஓடும்போது தேரின்
அச்சாணி முறிந்தால்மேலே
அமர்ந்திருப்பவர்களுக்கு
பாதிப்பு ஏற்படும் என்பதால்
பால்ரஸ்,கிரீஸ் உபயோகித்து
புதிய வழி கண்டார்கள்

அச்சாணி அகன்றதுபோல்
அகமுடையானும்
குடிக்கும் பழக்கத்தை
புதிய வழியெனக் கொண்டானோ!
வாழ்க்கை தேருக்கு தான்
பாதிப்பு இப்ப அதிகம்

நிற்க வைக்கும்




நீண்ட புல் என்றாலும்
நிழல் தராது
ஆனால் ஆடு, மாடுகள்
அந்த புல்லை மேயும்
பால் சுரக்கும்
பசுவின் மடி நிரம்பும்,
கறக்கும் பாலை
குடிக்கும் மக்களுக்கு
சீமைப்புல்
சத்து உணவாகும்
நிழல் தராத புல்நம்மை
நிமிர்ந்து நிற்க வைக்கும்


தெரியாதா தனது குறை!




குற்றம் புரியாத மனிதன்
புவியில் எங்குமில்லை,
நிறை, குறை தெரியாமல்
குறை கூறலாமோ!
குறை கூறும் நெஞ்சம்
கறை படும்,
குற்றம் பார்க்கில்
சுற்றமில்லை

தன்னோட முதுகு
தனக்கு தெரியாததுபோல்
ஊசியை பார்த்து
சல்லடை சொன்னதாம்
ஊசிக்கு வாயில
ஓட்டையென்று,
ஏதும், அறியாமல்
ஏளனம் செய்யலாமோ!

ஊசிக்கு ஒரு ஓட்டை
உளறிய சல்லடைக்கோ
உடம்பெல்லாம் ஓட்டைகள்,
ஊசியோ இரு துணிகளை
ஒன்றிணைக்கும்,
தேவையற்ற குப்பைகளை
தக்கவைக்கும் சல்லடைக்கு
தெரியாதா தனது குறை?