வெள்ளி, 15 ஜூன், 2018

இனி என்ன செய்திடுவான்?




ஏதேதோ கனவுகள்
எத்தனையோ ஏக்கங்கள்
அத்தனையும் சுமந்துகொண்டு
அரைகுறை வாழ்வு வாழும்
ஒரு தாய்க்கு வயது ஐம்பது,
பிறந்த பிள்ளைகள் மூன்று
இப்ப இருப்பதோ இரண்டு

கடைகுட்டி மகன் மீது
கொள்ளை பிரியம் தாய்க்கு,
பெண்மைக்கே உரிய
பொறாமையால பிள்ளையை
கடலம்மா எடுத்து போனாள்
கண்ணிலே காட்டாம
காலத்தை கடத்தி விட்டாள்

கொழும்பில் குடியேறி
குடும்பத்தோடு வாழும்
மூத்த மகனோடு சிலகாலம்
இருந்துவிட்டு,
இரண்டாவது மகன்
வீட்டில் வாழ அந்தத்தாய்—கப்பலில்
இந்தியா திரும்பும்போது

வீசிய புயற்காற்றால்
வீரியம் காட்டும் அலைகள்
கப்பலை ஆட்டி படைக்க—பயணிகள்
கடவுளை பிரார்த்தித்து அழ ,
அந்த அன்னையிடம் மாலுமி
“அமைதியாய் இருக்கிறீர்களே
 உங்களுக்கு பயமில்லையா” என்றார்


அன்னை சொன்னாள்
“ எனக்கு என்ன பயம்?
கப்பல் கரை சேர்ந்தால்
காத்திருக்கும் எனது இரண்டாவது
மகனைக் காண்பேன்—திசை
மாறி கொழும்பு சென்றால்
மூத்தமகனைக் காண்பேன்

கப்பல் மூழ்கினாளோ
கடலில் என் கடைசி மகனைக்
காண்பேன்,
எப்போதும் நான்
எதற்கும் தயாராயிருக்கிறேன்
இதற்கு மேல் இறைவன்
இனி என்ன செய்திடுவான்?



வியாழன், 14 ஜூன், 2018

உருப்படுமென்று




தொந்தரவு செய்த
தன் ஆறு வயது பையனிடம்
துண்டுகளாக வெட்டிய
உலகப்படமொன்றை தந்து
ஒன்றிணைக்க சொன்னார்

ஒரு மணி நேரத்தில்
சரியாக இணைத்து கொடுத்த
சிறு பிள்ளையைக் கண்டு
பெருமிதம் கொண்ட தந்தை
எப்படி செய்தாய் என்றார்?

உலகப்படத்தின்
மறுபக்கத்தில் இருந்த
மனிதப்படத்தை சேர்த்தேன்
உலகப்படம் தானாக
முழுமையானது என்றான்

ஆச்சரியமடைந்த தந்தை
அகமகிழ்ந்தார்,
ஒன்று புரிகிறதுமனிதன்
முதலில் சீர்பட்டால்
உலகம் உருப்படுமென்று.



வியாழன், 7 ஜூன், 2018

இதனை உணரவேண்டும்




மஹாபாரத மண்ணுக்கு
மரியாதையுண்டு எப்போதும்
மக்கட்தொகை பெருக்கம் அதிகம்,
கானகத்து விலங்குபோல
கல்லாதாரும் இங்கு அதிகம்

மக்களின் வரிப்பணத்தில்
மக்களுக்கு இலவசம் தந்து
மக்களை மாக்களாக்கி
மகோன்னத வாக்கை பெற்று--இங்கு
மக்கள் பிரதிநிதியாவதும் அதிகம்

நீருக்கும், சோறுக்கும்
நாளெல்லாம் போராடும்
நம்மோட மக்கள் அதிகம்,
ஊட்டச்சத்து இல்லாமஇங்கு
உயிரிழக்கும் குழந்தைகளும் அதிகம்

அனைத்தும் அறிந்திருந்தும்
அறியாதவர்போல்
அடுத்தவருக்கு உதவாதவர்கள் அதிகம்,
தான் மட்டும் வாழ எண்ணும்
தான்றோன்றிகளும் இங்கு அதிகம்

அதிகம் ஆகாதவரை
அனைத்தும் அழகு தான்,
உயிரைக் காக்க
உதவும் ஆக்சிஜனேயானாலும்
அளவோடு இருப்பது தான் நலம்

ஒன்று தெரியுமா உனக்கு
அதிகமாகும் ஒன்றால்
இழக்க நேரும் மற்றொன்றை,
இது இயற்கை வகுத்த நீதி--அனைவரும்
இதனை உணரவேண்டும்



ஞாயிறு, 27 மே, 2018

உருவாகுதோ




தன்னோட பிள்ளை
தரணியில் உயர்ந்திட
நற்கல்வியும்,
நன்னடத்தையும் கற்றுதரநம்
முன்னோர்கள் பிள்ளைகளை
குருவிடம் ஒப்படைத்து
குருகுலத்தில் சேர்த்தனர்

குருவைத்தவிர எவரும்
உள்ளே வர இயலாத
குருகுலத்தில்
இடையூறு ஏதுமின்றி
அயராது கல்வி கற்று
ஒப்பில்லா சிறப்புடன்
உயரம் தொட்டார்கள்

ஆசிரியருக்கு தேவையான
அனைத்து பணிகளும், அன்று
படிக்கும் மாணவர்களுக்கு
பாடமானது--அதனை
அன்றாடம்செய்து முடிப்பதும்
அவர்களின் கடமையானது

தமிழகத்தில்  தற்போது
தேர்வுக்கு மாணவர்கள்
எட்டு திசை நோக்கி
எங்கெங்கோ போவது
கல்வியின் தரம் உயர
குருகுலம் மீண்டும்
உருவாகுதோ!

போற்றுவோம்




காலமெல்லாம் மனைவியாய்
கட்டுபட்டு வாழ
தொட்டு கட்டிய தாலி தானே
தொலையாத சாட்சி

பணிவிடை செய்யவும்
புருஷன்  இறந்தால்
உடன் கட்டை ஏறவும்
வழி வகுத்தது பழங்கால மனுநீதி

மனித சாதியைத்தவிர
மற்ற எந்த உயிரினமும்
பெண்ணினத்திற்கு இந்தளவு
பாதிப்பு தந்ததில்லை

பெண்கள் உடல் ரீதியா
பலவீனமானவர்கள்ஆனால்
அறிவில் சிறந்தவர்கள்
ஆண்களைவிட புத்திசாலிகள்

உடல்வலியைத் தாங்கும்
வல்லமை பெற்றவர்கள்,
நினைவாற்றலில்
சிறந்து விளங்குபவர்கள்

ஆயிரம் ஆண்டுகள் போராடி
இருநூறு ஆண்டுகளுக்கு முன்
உடன் கட்டை ஏறும்
வழக்கத்தை ஒழித்தார்கள்

பெண்களுக்கு இதெல்லாம்
எளிதில் கிடைத்ததல்ல
போராடி  பெற்றவை
போற்றுவோம்


வியாழன், 17 மே, 2018

உருமாறும்




கை பிடித்த
கணவனின் கைகளில்
கட்டுண்டு கிடக்கும்
காதல் மனைவிபோல
விரல்களில் அடங்கி
இதழ் பதிக்கும்
இன்பம் தரும்
மோகத்தில் சூடேற்றும்,
போதையில் மயங்க வைத்து
கள்வனைப்போல்நலத்தைக்
களவாடும்
சாம்பலாக உருமாறும்
சாவதற்கு வழிகாட்டும்
இந்த ஆறாவது விரலாட்டம்
அணையாத சிகரெட்டு


ஞாயிறு, 13 மே, 2018

நிறைவு தந்து மகிழவைக்கும்




இறைவன் தந்த உயிர்
அனைத்துக்கும் மேலானது
அதனினும் சிறந்தது
ஒழுக்கம்அது
ஒருவருக்கு உயர்வையும்,
பெருமையும் தரும்

நல்லது, கெட்டது அறிந்து
நன்னெறியில்
நடப்பதைக் குறிப்பது
ஒழுக்கம்இதனை
விதைப்பவர்
புகழை அறுவடை செய்வார்

இழக்கும் செல்வத்தை
மீண்டும் ஈட்டலாம்,
நலம் குன்றினாலும்
நாம் அதனைத் திரும்பப்பெறலாம்,
ஒழுக்கத்தை இழந்தால்புகழும்,
ஆன்மாவின் அழகும் நிலைக்காது

ஒழுக்கம் இல்லாதவனை
உலகம் மதிக்காது
ஒழுக்கம் உள்ளவனை
உலகம் உள்ளளவும் போற்றும்
நல்ல நட்பு தரும்மன
நிறைவு தந்து மகிழவைக்கும்