அசுர வளர்ச்சி

பிரபஞ்சம் படைத்த

பெரிய பூமிக்கு

வளர்ச்சியில்லை

 

பூமி படைத்த

மானிட இனத்துக்கு

ஆறடி வளர்ச்சி

 

மனிதன் படைத்த

செல்போன் இண்டர்னெட்டுக்கு

அசுர வளர்ச்சி

 

பிரபஞ்சம் சுருங்கியதுபோல்

ஒரு காட்சி

இதுவும் சுழற்சியோ!

 

தந்தி

சொந்தத்தின்

மரணத்தை

இறந்தபின்

சுமந்து வரும்

எப்போதும்

தந்தி

 

தந்தியின் சாவை

சாவதற்குமுன்பே

முந்தி தரும்

செய்தியாய்

தண்டோரா

போட்டு

 

வருத்தத்துடன்

நாளிதழில்

தெரிவிக்கிறார்கள்

நாட்டிலுள்ள

சொந்தங்களுக்கு.

 

பரம்பரையின் பாதிப்பு.

கச்சப் பூமாலை

சிக்கியது

இலங்கை கையில்

 

பிச்சு எறிந்த

பூமாலையாய்

மீன்பிடித் தொழில்

 

வாடிய பூக்களாய்

வாழ்விழந்த

மீனவர்கள்

 

மீனவர்களும் படகுகளும்

நாளும் சிறைபடும்

இராவண பூமியில்

 

சிறை பிடிப்பது

புதிதல்ல

பரம்பரையின் பாதிப்பு!

எல்லோரும் ஊனம் தான்

ஒரு கண்ணை இழந்தவன்

கடவுளுக்கு நன்றி கூற

மறப்பதில்லை

குருடனைக் காணும்போது

 

கால்வயிறு நிறைந்தவன்

கடவுளை வணங்காமல்

இருந்ததில்லை

பசியில் துடிப்பவனைக் காணும்போது

 

நெற்றி வேர்வை சிந்தியும்

வயிற்றுபசி தீராத

பாமரனும் பிறப்பால்

ஊனம் தானே!

 

ஊராரை ஏமாற்றி

ஊர்பணத்தில் திளைத்திடும்

எத்தர்களும் இழிசெயலால்

ஊனம் தானே!

 

இலஞ்சத்தில் உயிர்வாழும்

வஞ்சகக் கள்வர்களும்

நஞ்சானவர்கள்-அவர்களும்

மனதளவில் ஊனம் தானே!

 

ஊனத்தைக் கொடுத்து

உயிர்வாழ வழியில்லாதபோது

படைத்த இறைவனும்

படைத்தலில் ஊனம் தானே!

 

ஊனக் குறையுள்ளோரை

மாற்றுத்திறனாளிகளென

மாற்றியமைத்த

பாரதத் தேசத்தில்

 

வாழ்க்கை நம்பிக்கை

இரண்டையும் இழந்து நிற்கும்

அனைவரும் ஊனம் தான்

இறைவனையும் சேர்த்து.

 

 

 

 

அறுவடையாகிறது.

எப்போதும் முப்போகம்

காணும் சோழவள நாடு

நெற்கதிரின் அறுவடைக்குக்

காலமெல்லம் காத்திருந்து

வழியில்லாதபோது

மறக்காமல்

மனித உயிர் அறுவடையாகிறது

நாள்தோறும் அரசியலில்.

சொல்லாமல் இருப்பேனோ?

பெத்தெடுத்த செல்வமெல்லாம்

சுத்தி நின்னு பார்க்கையில

வெட்டறிவா வீச்சால

வெட்டியென்னை சாயவச்சு

ஊருக்கு தூக்கிவந்து

பலபேரு முன்னால

வாசலில்ல கட்டிவச்சு

உயிரை எடுத்தவனை

வாயிருந்தால்-வாழை நான்

கத்தாமல் போவேனோ?

இல்லை பட்ட துயர்

சொல்லாமல் இருப்பேனோ?