மண்ணையும்
மங்கையரின் மனதையும்
நனைத்து போகும் நதியை
நினைத்து மகிழ
ஓர் ஆடிப்பெருக்கு
பயிர் விளைத்த நிலத்துக்கும்
நிலம் உழுத காளைக்கும்
உளம் கனிந்து எடுக்கும்
ஒரு பொது திருவிழா
பொங்கல் பண்டிகை
பாகுபாடின்றி அனைவருக்கும்
படிப்பறிவு தந்து
மேன்மையுறச் செய்யும்
கல்வி அன்னைக்கு
ஒரு சரஸ்வதி பூஜை
தேசத்தை அழிக்கும்
தீமைகளை வீழ்த்த
பட்டாசு வெடித்தும்
பழையன கலைந்தும்
கொண்டாடும் ஒரு தீபாவளி
மாசுபடுத்தாத
எல்லா தொழில்களையும்
வாழ்த்தி போற்றி
வணங்கும் ஒரு நந்நாள்
ஆயுத பூஜை
ஒற்றுமையையும்,
உழைப்பையும் போற்றவும்
கலைகளை வளர்க்கவும்
நல்ல தருணங்களாக
திருநாட்கள் அமைந்தன
நம்பிக்கைகளின் கொண்டாட்டமே
நம் பண்டிகைகள்—அன்றவை
இயற்கைக்கும், மனிதனுக்கும்
இருக்கும் உறவை
பறைசாற்றியது
அறிவதற்கும், பகிர்வதற்கும்
அன்றைய பண்டிகைகள்
வாய்ப்பளித்து மகிழ்ந்தன—இன்றோ
சிந்தனையற்ற சடங்குகளாகி
முடங்கியது வேதனை தான்.
கருத்துகள் இல்லை:
கருத்துரையிடுக